قررت اكتب باللهجة العراقية لعل وعسى يفتهمني المعنين بكلامي
ـــــــــــــــــــــــــــــــــــــــــــــ
اخواني اعضاء البرلمان
سيداتي عضوات البرلمان
سادتي اعضاء البرلمان
هاي شبيكم
اي انتم شبيكم
جنكم ولا عايشين بهاي البلد
تدرون انتم شجاي تسوون بالناس؟؟؟
كل جلسه اخلي ايدي على كلبي اخاف الناس البره تشوفكم وتضحك على حالنا
اخاف الحكام الدكتاتورين بالدول العربية يسجلون جلساتكم ويعرضونها على الناس ويكلولهم شوفوا الديمقراطية اللي جابتها امريكا للمنطقة
تتعاركون على الزغيرة والجبيرة
تتنافسون على الحجي كدام الكامرة جنكم ببرنامج الاتجاه المعاكس
تزايدون على كل المنظمات الطائفية بطروحاتكم
تحجون بالمحاصصة علنا وبشكل فج اكثر من اي جهه اخرى
تتنافسون على المراكز والمناصب
تقرون رواتبكم اللي الله وحده يعلم شكد وتنومون سلم الرواتب الخاص بالموظفين اشهر طويله
تقرون تقاعدكم العجيب الغريب وقانون التقاعد الموحد يتأجل سنة بعد سنه
تيار الصدر يطالب بتحريم مدينة الصدر
وجماعة المجلس الاعلى يطالبون بتحريم الكرادة
والتوافق يطالبون بتحريم حي العدل
وبقية اهل العراق ياهو الهم
موعيب هذا الطرح الطائفي
رئيسكم يغني منين اجيب ازرار للزيجه هدل وهو على منصة الرئاسة ويتلاطش بوكسات وي عضو برلمان اخربالكواليس
اذا انطرح موضوع تخصصي على النقاش لازم الكل يحجون حتى اذا كانوا ما يعرفون شيء عن الموضوع
يعني ايصير واحدكم يتشارط وي مرته ويكلها اليوم اطلع بالتلفزيون
تنفخون وتكبرون بامتيازاتكم ومصالحكم وحقوقكم وما تنتبهون لهذا المواطن المسكين
اخوتي والله اثبتوا فشلكم وعدم اهليتكم لتمثيل الشعب
صيروا شجعان مرة وحدة وقدموا استقالتكم
لو ما تكدرون تستغنون عن الراتب الخرافي
وبالعافييييييييييييييييييييييييييييييييييييييييييييييييييية
